Chin National Front adirnak Kum 25 tlinnak Silver Jubilee cu March 20 ah Victoria Camp, Chinram ah sunglawi ngai in an tuah tiah theih a si. CNF cu Mah te rorel i ukkhawhnak (Self-determination), Zauk phung (Democracy) kan ngeih khawhnak le adik a hmunmi Ramkomh Cozah (Federal) hmuh khawhnak ca tiin March 20, 1988 ah rak dirhmi asi i atu ahcun Kum 25 atling ve cang.
“Chin miphun cu mah te arak uk i Mirang ral zong biatak tein arak do ve mi kan si i Panglong hnatlaknak ruang ah Kawlram Ramkomh kan ser. Cu kan sermi cu Kawl (Bama) mi tam deuh nih ramkomh muisam siti loin Cozah pakhat bantuk in an rak kan tlaih pengmi kan doh hi kan nuhrin covo le kan miphun sinak man caah ral kan do a si i hi covo kan hmu hlan lo cu kan techin fa parchan tiang kan do peng ko lai tiah CNF thanhca (Statement) ahcun an langhter. Chinram nih zalawng tein kanmah le kan kong kanmah nih zalawng tein rorelnak nawl kan ngei hlan lo cu ral a dai lai lo tiah an tial.
CNF le Kawl Ramkomh Cozah he remdaihnak ichon khawhnak dirhmun hi CNF i teinak hnarcheu tluk kar kan hlan a si i Chinram le Chin miphun nih hi CNF cawlcanghnak ah thazang tampi chuah aherh zia Chin Miphun Ralthawh Ni CNF Chairman Pu Lian Uk nihcun Chin mizapi sin cakuat ahcun a langhter.
CNF hi Kawlram tlangcungmi hna dirhmi United National Federal Council chungtel le National Democratic Force (NDF) chungtel pakhat asi i atulio Kawlram remdaih sernak ca zongah hmunkhat ah hmai kan fong ti lai tiah biachahnak a ngeimi an si.
Chin National Front hi 1988 Kum Kawlram Ramkhel buaibainak ruangah India ram zam Chin Sianghleirun le hruaitu pawl nih March 20, 1988 ah an rak dirhmi asi i atu ahcun Ram le miphun ca tiah minung 70 leng nih nun an pek cang.
Sialling 